التعليم

السيره العطره للشهيد احمد منسي برجاء قرائتها للنهايه

السيره العطره للشهيد احمد منسي برجاء قرائتها للنهايه

صورة أرشيفية
.مواضيع عامه

احمد منسى فى سطور بلسان احد اصدقائه
“منسى يعنى الطفل اللى أبوه دكتور شاطر ممارس عام بيعالج الناس بملاليم عشان مؤمن ان الطب اتخلق لعلاج الناس مش لتقليب جيوبهم، دكتور صابر المنسى اللى لما مات فى 2013 كان كشفه 5 جنيه، اقل من تمن كان البيبسى، أبوه كان مثله الاعلى واكتر حد منسى بيحبه ف الدنيا، وشاء النصيب انه يبقى اول واحد يدخل يتدفن جنبه.
منسى المراهق اللى بيقرر انه حيدخل الكلية الحربية وبعدين الصاعقة عشان عارف هو عايز ايه، وفاهم ان هى دى الحته اللى حيعرف ينفع فيها بلده وأهله ونفسه، وكان طالب متفوق وطوب الأرض فى الكليه عارفه وبيحبه.
منسى الظابط فيه مليون حد من زمايله يقدر يتكلم عليه احسن منى ومئات منهم قالوا شهادات تشيب من عظمتها، انما انا شفت منسى نائب ملحق الدفاع اللى اشتغل معانا فى باكستان، من اول يوم اتقابلنا وربنا وضع ف قلوبنا كلنا محبه غريبة ليه، منسى اختار باكستان مع انها المفروض مش اختيار جذاب لاى حد وكان ممكن يختار بلد تانية لانه شاطر وليه خاطر عند اللى بيوزعوا الناس، بس اختارها لان فيها جيش قوى ومتطور حيتعلم منه، وكانت علاقته بكل الناس فى باكستان رائعة، وعمل شغل هايل، وكان ممكن يتمدله بعد السنتين بتوعه بس هو فضل ينزل مصر وقال جملته الشهيرة “انا عايز أٍسيب المكان لحد غيرى، أنا خدت رزقى خلاص ييجى حد تانى ياخد رزقه” ودى حاجة مابيعملهاش ناس كتير، أو الحقيقة مابيعملهاش حد أصلا دلوقت
منسى اللى لما رجع مصر كان مع ثورة يناير (بدون تفاصيل)، وكان ضد الاخوان ومع ثورة 30 يونيو (برضه بدون تفاصيل)، وكان راجل موضوعى بيقول على اللى شايفه صح صح، وع اللى شايفه غلط غلط، لا غاوى سفسطة ولا يكر كلام مش متأكد منه ولا يقول معلومة لمجر انه سمعها من حد، بيقرأ وبيحلل وبيسمع وبيفهم وبيتناقش بالراحة مهما كانت سخونة الموضوع.
منسى اللى اشتغل فى سيناء بمزاجه اكتر من 3 سنين، ولما سابها السنة اللى فاتت قعد يتنطط عشان يرجعلها لحد ما قائد الكتيبة 103 صاعقة استشهد فى اكتوبر اللى فات فكلموه قالوله ترجع يامنسى قالهم حالا، ورجع عشان يكمل اللى بدأه، وكان قراره انه لو ماستشهدش لحد ما يسيب سينا حيعلق عقيد ويطلب يطلع معاش ويرتاح بقى، وكان بيطمنا ان الوضع فى سينا بيتحسن وان قريب حنخلص على الكلاب اللى هناك، وان رجوعه ممكن يبقى ف خلال 6 شهور.
منسى اللى كنا من خوفنا عليه بنقوم كل يوم الصبح نتطمن انه عايش، وبطولاته ضد الارهاب وداعش فى سيناء كانت زى الأساطير اللى الناس بتحكيها بانبهار، وهو لما يحكيلنا عن بعضها بعد زن مننا يتكلم ببساطة كانه بيتكلم عن مذكرة كتبها وهو ع المكتب، او عن مشوار للسوبر ماركت يشترى حاجة البيت.
منسى اللى كان فيه رتب اعلى منه بتقوله يا قائد، واللى كان ظباطه وعساكره بيعشقوه ويعتبروه اخ كبير وساعات أب، اللى كان بيحسس اى حد بيشتغل معاه انه مهم وعظيم حتى لو بينه وبين نفسه مش مقتنع بيه بس عشان مايكسرش بخاطره.
منسى الأب اللى عنده 3 عيال بيعشقهم، اللى خلى حمزة راجل وهو لسه عنده 10 سنين، اللى بيحترم مراته ويحطها فوق راسه ويكبرها قدام كل الناس، اللى كان طلبه الوحيد لما اتنقل سينا ان اخوه المقدم ف الجيش برضه يتنقل مكان اقرب للقاهرة عشان يبقى فيه دايما واحد فيهم قريب من والدته المريضة ( ربنا يشفيها ويصبرها).
منسى البنى آدم جدا جدا، صاحبى واخويا واستاذى، الرضا اللى كان جواه وباين على وشه وف ابتسامته طول الوقت كان مصدر الهام ودرس دايم ليا وباضرب بيه المثل لغيرى، الشجاعة المفرطة التلقائية السهلة اللى بيعملها وهو ش حاسس بيها، الشاعر اللى بيكتب ويبعتلى ولما اكتب يشجعنى، الراجل اللى ربنا اراد اننا نشوف سوا مواقف ذكرها مش مهم دلوقت وكان ثابت وصاحب مبدأ، اللى كانت الدنيا تبقى بتتهد حواليه مايتهزش انما موقف عبيط من طفل صغير ممكن يخليه يعيط بصوت، اللى جالنا من العاشر من رمضان للزمالك فى اخر اجازة الساعة 11 بالليل وكأنه جاى يسلم علينا وادانا درس فى القناعة من غير ما يحس وسلم ومشى.
الدنيا مابتجبش زيك كتير يا منسى، ومن حسن حظى انى عرفتك وكنت صاحبك، ومن حسن حظك انك روحت لربنا بالطريقة اللى كان نفسك فيها، انت الكسبان واحنا اللى خسرنا صحبتك، ربنا يرحمنا رحمة واسعة عشان نعرف نجيلك فى المكان اللى انت فيه دلوقت، ومافيش حاجة تتقال تانى بعد اللى جدك الكبير قاله امبارح قدام قبرك ” كان عنده 4 سنين و شهم “. سلام مؤقت يا شهم. ”

من فضلكم اعملوا #شيرر علشان الكل يعرف السيره العطره للبطل #احمد_منسي
واتركوا دعوه من قلبكم للشهيد #احمد_منسي
Ahmed Mansy

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى